Ши Жиньпин: ‘COVID-19’-тэй тэмцэхэд зориулж хөгжиж буй орнуудад 2 тэрбум долларын дэмжлэг үзүүлнэ

БНХАУ-ын дарга Ши Жиньпин даваа гаригт тус улс “COVID-19”-ийн эсрэг арга хэмжээнд зориулж бусад улс орнуудад хоёр тэрбум ам.долларын тусламж үзүүлнэ гэж мэдэгдлээ.

Ши Жиньпин өчигдөр ДЭМБ-ын Дэлхийн эрүүл мэндийн цахим чуулга уулзалтад оролцож, үг хэлэх үеэрээ “Хятад улс цар тахлын улмаас үүссэн сөрөг нөлөөг бууруулах зорилгоор дэлхийн бусад улс, тэр дундаа хөгжиж буй орнуудын эдийн засаг, нийгмийн хөгжилд зориулж хоёр жилийн хугацаанд хоёр тэрбум ам.долларын тусламж үзүүлнэ” гэсэн байна.

Тэрээр цааш ярихдаа “COVID-19”-ийн вакциныг амжилттай гарган авсан тохиолдолд үүнийг хүн төрөлхтний сайн сайхны төлөө зориулах болно. Хятадын биотехнологийн компаниуд вакцин боловсруулж, турших ажилд тэргүүн эгнээнд ажиллаж байгааг онцолжээ.

НҮБ-ын Эрүүл мэндийн салбар буюу ДЭМБ-ын Дэлхийн эрүүл мэндийн 73 дахь чуулга уулзалт энэ онд цар тахлын улмаас богиносгосон хөтөлбөрийн хүрээнд тавдугаар сарын 18-19 өдрүүдэд цахим хэлбэрээр зохион байгуулагдаж байна. Швейцарын Женев хот дахь ДЭМБ-ын төв байранд даваа гаригт эхэлсэн энэхүү уулзалтаар тус байгууллагын нийт 194 гишүүн орны төлөөлөгч хуралдаж, ДЭМБ-ын удирдлага, үйл ажиллагаа, төсвийн талаар хэлэлцэх юм.

Ройтерс агентлагийн мэдээлснээр Дэлхийн эрүүл мэндийн чуулга уулзалтын эхний өдөр 116 гишүүн улс Европын холбоо, Австрали тэргүүтэй орнуудын өргөн барьсан "COVID-19”-ийн гарал үүсэл, тархалтыг нягталж үзэхийг уриалсан тогтоолын төслийг дэмжиж байгаагаа илэрхийлсэн байна. Хэрэв нийт 194 гишүүдийн 129 нь буюу гуравны хоёр нь дэмжсэн тохиолдолд уг асуудлыг хэлэлцэх юм.

Шинэ коронавирусийн анхны голомт болох БНХАУ-ын хувьд “COVID-19”-ийн гарал үүслийг судлах олон улсын мөрдөн шалгах ажиллагаа явуулах уг уриалгын эсрэг санал өгсөн байна. БНХАУ-ын дарга Си Зиньпин даваа гаригт чуулга уулзалтад хандан үг хэлэх үеэрээ уг асуудлын талаар тодорхой суурь илэрхийлээгүй ч цар тахлыг бүрэн хяналтдаа оруулсан цагт олон улсын хяналт доор, мэргэжлийн эрдэмтэн, судлаачдын тэргүүлэх оролцоотойгоор нээлттэй мөрдөн шалгах ажиллагаа явуулах нь зүйтэй гэжээ. Мөн тэрээр Хятад улс нээлттэй, ил тод байхыг эрхэмлэж байгааг цохон тэмдэглээд тус улсын эрдэмтдийн тодорхойлсон вирусийн генийн дарааллыг ДЭМБ-ын гишүүн орнуудтай хуваалцсан юм.  

АНУ-ын Ерөнхийлөгч Доналд Трамп өнгөрөгч амралтын өдрүүдээр хориг тавиад байсан тус улсаас ДЭМБ-д олгодог санхүүжилтийн зарим хэсгийг сэргээх боломжтой талаар мэдэгдсэн. АНУ-ын Конгресс ДЭМБ-ын 2020 оны санхүүгийн жилд тус улсаас 122 сая ам.долларын санхүүжилт хийхээр тусгасан. Тус улсын Эрүүл мэндийн асуудал эрхэлсэн Төрийн нарийн бичгийн дарга Алекс Азар даваа гаригт чуулга уулзалтад хандан үг хэлэх үеэрээ ДЭМБ цар тахлын эхэн үед дэлхийн нийтийг шаардлагатай мэдээлэл, урьдчилан сэргийлэх чиглэлээр хангаж ажиллаж чадаагүй гэх зэргээр хурцаар шүүмжилсэн юм. Харин АНУ-ын Ерөнхийлөгч Доналд Трамп энэ удаагийн Дэлхийн эрүүл мэндийн чуулга уулзалтын талаар сэтгэгдлээ илэрхийлэхдээ ДЭМБ бол Хятад төвтэй, тэдний утсан хүүхэлдэй гэх байр суурийг илэрхийлээд ДЭМБ үргэлж Хятадын талд байж бидэнд маш муу, аймшигтай буруу зөвлөгөөнүүдийг өгсөн гэсэн байна.

Эх сурвалж: Reuters

  • Шинэ
  • Их уншсан