“Гэгээн Муза” наадамд өрсөлдөх шилдэг бүтээлүүд тодорлоо

Драмын урлагийн шилдэг бүтээл, уран бүтээлчийг шалгаруулах “Гэгээн Муза-16” олон улсын театрын наадам 16 дахь удаагаа тун удахгүй болох гэж байна. Нэгдүгээр шатны үзлэгт гадаад, дотоодын нийт 50 гаруй уран бүтээл оролцож, 20 бүтээл шалгаран хоёрдугаар шатанд цомын төлөө өрсөлдөхөөр болжээ.

Энэ жилээс эхлэн наадмын шалгаруулалтын журамд өөрчлөлт оруулж “Үндсэн жүжгийн ангилал” буюу “Драмын жүжгийн төрөл”, “Хөгжимт жүжгийн төрөл”, “Хүүхдийн жүжгийн төрөл”, “Бэсрэг жүжгийн ангилал” буюу “Нэг хүний жүжгийн төрөл”, “Хоёр хүний жүжгийн төрөл”-үүдэд гранпри шагналыг олгохоор болсон байна. Мөн энэ жилийн наадмаас эхлэн театрын судлал шүүмжлэлийг хөгжүүлэх, залуу судлаачдын идэвхи оролцоог нэмэгдүүлэх, тэдний бүтээл туурвилыг нийтийн хүртээл болгох зорилгоор “Урлагийг хүртээх-урлаг” төслийг санаачлан хэрэгжүүлж буй юм байна. “Гэгээн Муза-16” наадамд Монгол, Оросын холбооны Буриад улс, Румын, Итали, Энэтхэг, Гүрж, Шри-Ланк, Словен, Люксенбург, Грек улсын уран бүтээлчид болон зочин шүүгчид оролцоно. Тус наадам энэ жил “Хүүхэд оролцооны бүтээл” болон “Драмын жүжгийн төрөл”, “Хөгжимт жүжгийн төрөл”, “Хүүхдийн жүжгийн төрөл”, “Хоёр хүний жүжгийн төрөл”, “Нэг хүний жүжгийн төрөл”-д зохион байгуулагдах юм.  

Энэ удаагийн наадмын зочин шүүгчээр ОУТИ-ийн гишүүн, жүжгийн зохиолч, театр судлаач Татъяана Азман, ОУТИ-ийн Афины төвийн дэд ерөнхийлөгч, Грекийн Аристотелийн их сургууль болон Үндэсний театрын дэргэдэх драмын сургуулийн профессор, театр судлаач Саввас Патсалидис, Их Британы театр, киноны жүжигчин, Люксембургийн Fundmentals Monodrama наадмын уран сайхны удирдагч Стив Кариер нар урилгаар ирж ажиллана. Наадмын хүрээнд “Орчин үеийн драмын урлагийн чиг хандлага, Театрын судлал шүүмж” сэдэвт сургалт явагдах бөгөөд наадмын зочин шүүгчээр ажиллах Саввас Патсалидис уг сургалтыг удирдан явуулах аж. Наадмын шалгаруулалтын тоглолт 2022.06.03-10-ны өдрүүдэд болно.

“Гэгээн Муза-16” наадамд өрсөлдөх бүтээлүүд

Драмын жүжгийн төрөлд

• “Анна Каренина” /УДЭТеатр/

• “Гэм зэм” /Орфей театр /

• “Шар гэгээ” /Төв аймгийн “Монгол туургатан” театр/

Хөгжимт жүжгийн төрөлд

• “Нүдтэй наран тамга” /Дорнод аймгийн ХДТеатр/

• “Гоолингоо” /Сүхбаатар аймгийн “Жаахан шарга” театр/

• “Хөх нар” /Өмнөговь аймгийн ХЖТеатр/

• “Домог амилсан нутаг” /Дархан-Уул аймгийн “Залуучууд” театр/

Хүүхдийн жүжгийн төрөлд

• “Жангар” /Завхан аймгийн ХЖТеатр/

• “Тангарагт хаан” /Орхон аймгийн ХЗТеатр/

• “Гэрэл асаа” /Дорноговь аймгийн “Саран хөхөө” театр/

Нэг хүний жүжгийн төрөлд

• “5+1=7” /Монгол/

• “Өглөөний цайны өмнө” /Монгол/

• “Би Толгонай” /ОХ-ны Буриад/

• “Хурандаа бичиж байна” /ОХ-ны Буриад/

• “Нижинский” /Румын/

• “Knots” /Итали/

• “Untouched” /Шри Ланка/

• “Fall again fly better” /Энэтхэг/

• “Дарвин” /Энэтхэг/

Хоёр хүний жүжгийн төрөлд

• “Хүн гөрөөс” /Монгол/

• “Сэтгэлд харвасан туяа” /Монгол/

• “Is God a Taoist” /Энэтхэг/

• “Flushed” /Гүрж/

 

  • Шинэ
  • Их уншсан