Төрийн албаны зөвлөл, Хөдөлмөр, нийгмийн хамгааллын яам хамтарсан уулзалт-хэлэлцүүлгийг зохион байгууллаа

“Төрийн албаны зөвлөл, Хөдөлмөр, нийгмийн хамгааллын яам хамтран “Алсын хараа-2050” Монгол Улсын урт хугацааны хөгжлийн бодлого, “Шинэ сэргэлтийн бодлого”-ыг хэрэгжүүлэх, төрийн бүтээмжийг нэмэгдүүлэх талаар хамтарсан уулзалт-хэлэлцүүлгийг зохион байгуулсан.

Уулзалт-хэлэлцүүлэгт Монгол Улсын Засгийн газрын гишүүн, Хөдөлмөр, нийгмийн хамгааллын сайд А.Ариунзаяа, Төрийн албаны зөвлөлийн дарга Б.Баатарзориг, тус зөвлөлийн Ажлын албаны дарга Г.Билгүүн болон албан хаагчид, “Шинэ сэргэлтийн бодлогын хурдасгуур төв”-ийн захирал Б.Дөлгөөн нар оролцож, төрийн албаны шинэтгэл, ангилал, зэрэглэл, төрийн бүтээмж, төрийн албан хаагчийн нийгмийн баталгаа, цалин хөлсний тогтолцоо зэрэг асуудлаар санал солилцож, ойрын хугацаанд хамтран хэрэгжүүлэх ажлын чиглэлээ зөвлөлдлөө.

Хөдөлмөр, нийгмийн хамгааллын сайд А.Ариунзаяа уулзалт-хэлэлцүүлгийг нээж хэлсэн үгэндээ төрийн албаны мэргэшсэн, тогтвортой байдлыг хангах, төрийн албан хаагчдын цалин хөлс, нийгмийн баталгааны тогтолцоог шинэчлэх, төрийн албаны хүний нөөцийн удирдлагыг үр дүнтэй хэрэгжүүлэхийн тулд өгөгдөлд суурилсан дүн шинжилгээ хийх талаар болон төрийн бүтээмжийг дээшлүүлэх чиглэлээр Засгийн газраас авч хэрэгжүүлж байгаа арга хэмжээний талаар танилцуулав.

“Шинэ сэргэлтийн бодлогын хурдасгуур төв”-ийн захирал Б.Дөлгөөн энэ үеэр хөгжлийн бодлогыг үр дүнтэй хэрэгжүүлэхэд төрийн чадамж чухал бөгөөд Шинэ сэргэлтийн бодлогыг хэрэгжүүлэх суурь нөхцөл нь төрийн бүтээмжийн сэргэлт болохыг онцолсон. Мөн шинэтгэлийг хэрэгжүүлэхэд үр дүнд суурилсан хандлагаар хандах, тулгадсан асуудлыг оновчтой тогтоож ажиллах шаардлагатайг дурдав.

Төрийн албаны зөвлөлийн дарга Б.Баатарзориг уулзалт-хэлэлцүүлгийг дүгнэж хэлсэн үгэндээ “Алсын хараа-2050” Монгол Улсын урт хугацааны хөгжлийн бодлого, “Шинэ сэргэлтийн бодлого” зэрэг хөгжлийн баримт бичгийг үр дүнтэй хэрэгжүүлэхийн тулд Төрийн албаны зөвлөл, төрийн албан хаагчдаас бодит үйлдэл, манлайлал гаргах шаардлагатайг тэмдэглэсэн. Мөн “Шинэ сэргэлтийн бодлого”-ын хэрэгжилт нь төрийн бүтээмжийн сэргэлтээс шууд хамаарлалтайг онцлов.

Мөн уулзалт-хэлэлцүүлгийн явцад төрийн албаны ангилал, зэрэглэл, цалин хөлсний тогтолцооны шинэтгэлийн талаар болон төрийн бүтээмжийг нэмэгдүүлэх талаар Сингапур улсын туршлагыг хэлэлцэж, “Алсын хараа 2050” Монгол Улсын урт хугацааны хөгжлийн бодлого, Шинэ сэргэлтийн бодлогын хүрээнд төрийн албаны ангилал, зэрэглэл, цалин хөлс, нийгмийн баталгааны тогтолцоог шинэтгэх, төрийн бүтээмжийг нэмэгдүүлэхэд чиглэлээр өргөн хүрээнд хамтран ажиллахаар тогтлоо.”

www.csc.gov.mn

 

  • Шинэ
  • Их уншсан