Сайд асан Б.Болорын “Эрдэнэт”-тэй холбоотой нууц тушаал энэ байна

(2016.10.06-9:46:19)


    УИХ-ын гишүүн Ц.Нямдорж “Монголын Засгийн газар оросуудын дарамт шахалтаас болж “Эрдэнэт” үйлдвэрийн 49 хувийг худалдаж авах давуу эрхээсээ татгалзсан асуудал бий. Сангийн сайд асан Б.Болор өнгөрсөн зургадугаар сарын 27-нд хоёр нууц тушаал гаргаж, “Эрдэнэт”, “Монросцветмет”-ийн хувьцаа эзэмшигчдийн хуралд оролцох удирдамжийг батлаад тэрхүү тушаалаараа “Эрдэнэт”-ээс Засгийн газарт ногдох 51 хувийг, яг хэрэг дээрээ бол 49 хувийг худалдаж авсан гэх хүмүүсийн мэдэлд шилжүүлэх ажиллагааг хийсэн. Ингэснээс болж “Эрдэнэт” үйлдвэрийн 51 хувь байхгүй боллоо. ТУЗ-ийн дарга нь хэн болсон нь одоо болтол ойлгомжгүй. Засгийн газрын 51 хувийг төлөөлж зурсан Сангийн яамны Б.Шинэбаатар гэдэг хүн өөрөө өөрийгөө “Эрдэнэт” үйлдвэрийн нэгдүгээр орлогчоор томилсон байна” гэх ноцтой мэдээллийг өнгөрсөн долоо хоногт хийсэн. Эрхэм гишүүн “Эрдэнэт” үйлдвэрийн 49 хувийг худалдаж авсан “шинэ” эзэд Засгийн газрыг үл тоомсорлож, ажлын хэсгийнхэнд нь дээрэнгүй хандаж буй талаар ч хэвлэлд өгсөн ярилцлагадаа дурдсан удаатай. Харин “Эрдэнэт”-тэй холбоотой хоёр нууц тушаал гаргасан” гэх хэргийн эзнээр тодорсон Сангийн экс сайд Б.Болор Засгийн газраас томилогдсон ажлын хэсгээс “Б.Болор хууль зөрчиж тушаал гаргажээ” гэх дүгнэлт гаргасан даруйд “Эрдэнэт”-ийн 49 хувь болон тухайн үед гаргасан тушаалуудынхаа талаар “ОХУ өөрийн эзэмшлийн хувь болох 49 хувийг Монголын компанид худалдсан. Үе үеийн Засгийн газар Оросын талаас үүнийг л хүсдэг байсан. Тушаал гаргасан асуудлын хувьд бол “Эрдэнэт” үйлдвэрийн ОХУ-ын талын хувь болох 49 хувь худалдагдлаа” гэсний дараа ТУЗ-д өөрчлөлт орж шинэ дүрэм журмаа батлуулах шаардлага гарсан болон Засгийн газрын шийдвэрийг үндэслэж уг тушаал гарсан. Монгол Улсад 51 хувийн эрхийг хэрэгжүүлэх бүрэн эрх нь бий” гэж уржигдар мэдэгдсэн. Тэр ч атугай санаатай хэлсэн үү, аль эсвэл хэсэг бүлэг хүмүүсийг дайруулж хэлсэн үү “Эрдэнэт” үйлдвэр үе үеийн улстөрчдийн шахааны бизнесээ хийдэг компани болчихсон байсныг бүгд л ярьдаг. Одоо энэ байдал нэлээд хумигдах, бүрмөсөн арилах боломжтой болж байна” гэж тайлбартаа дурдсан юм.
    Сангийн сайд асан Б.Болор ер нь ямар нууц тушаал гаргачихсан юм бэ. Энэ асуулт одоо ч хэвээр. Тэгвэл 2016 оны зургадугаар сарын 27-нд тухайн үеийн Сангийн сайд Б.Болорын “Эрдэнэт” үйлдвэрийн талаар гаргасан нууц тушаалыг уншигч та бүхэнд хүргэж байна. Тэрбээр “Төлөөлөн удирдах зөвлөлд нэр дэвшүүлэх удирдамж батлах тухай” 256 дугаар тушаалдаа “Монголросцветмет” ХХК-ийн ТУЗ-ийн бүрэлдэхүүнд төрийг төлөөлөх гишүүнээр Төрийн өмчийн удирдлага, бүртгэл, тооллого, хяналтын газрын дарга Б.Шинэбаатарыг санал болгосугай” гэсэн бол мөн өдөр гаргасан 255 дугаар тушаалаараа Б.Шинэбаатарыг дээрх компаниудын хувьцаа эзэмшигчдийн хуралд төрийг төлөөлөн оролцох төлөөлөгчөөр томилжээ. Харин түр хугацаанд “Эрдэнэт үйлдвэр” ХХК-ийн гүйцэтгэх удирдлагад хяналт тавих төрийн төлөөлөгчөөр Б.Өнөрмааг, “Монголросцветмет” ХХК-ийн гүйцэтгэх удирдлагад хяналт тавих төрийн төлөөлөгчөөр Д.Эрэвгийлхамыг томилж байсан байна. Сайд асан Б.Болор ийнхүү нэг өдрийн дотор хоёр өөр тушаал гаргаж Б.Шинэбаатар гэдэг эрхэмд “давуу эрх олгосон” нь Ц.Нямдорж гишүүний эгдүүцлийг хүргэсэн ч байж мэдэх юм. Учир нь тэрбээр 255 дугаар тушаалдаа “Эрдэнэт” үйлдвэр, “Монголросцветмет” ХХК-ийн ТУЗ-ийн гишүүн Б.Шинэбаатараас бусад одоо ажиллаж байгаа ТУЗ-ийн дарга, гишүүдийг чөлөөлөхийг дэмжих тухай удирдамжийг хавсаргажээ. Мөн дээрх компаниудын 49 хувийн хувьцаа эзэмшигчээс санал болгох гурван гишүүн, ТУЗ-ийн даргыг шинээр томилох, түр хугацаанд “Эрдэнэт үйлдвэр” ХХК-ийн гүйцэтгэх удирдлагад хяналт тавих 49 хувийн хувьцаа эзэмшигчийн төлөөлөгчийг дэмжихийг удирдамждаа тусгасан байна. Ц.Нямдорж гишүүний сүр дуулиан болгон мэдэгдсэн хоёр нууц тушаалын тухайд ийм юм. Харин Засгийн газар өчигдөр хуралдаж Сангийн сайд асан Б.Болорын гаргасан дээрх хоёр тушаалыг хүчингүй болголоо. Тэгэхээр “Эрдэнэт” үйлдвэрийн ТУЗ-д дахин өөрчлөлт хийж мэдэхээр болов. Тэр ч бүү хэл үйлдвэрийн 49 хувийн хувьцааг худалдаж авах санхүүгийн эх үүсвэрийг нэр бүхий арилжааны банкнаас гаргасан үйл явцыг шалгаж танилцуулахыг Монголбанкинд үүрэг болгосон юм.
Х.Тэлмэн     

































       

  • Шинэ
  • Их уншсан