Д.Сарангэрэл: Францын иргэнтэй ойр байсан хүмүүсийг ХӨСҮТ-д тусгаарласан

Манай улсад коронавирусын анхны тохиолдол илэрч Улсын онцгой комисс, ЭМЯ, ДЭМБ, ХӨСҮТ-ийн холбогдох албаны хүмүүс шуурхай мэдээлэл өгч ажиллаж байна. Цаг үеийн мэдээллүүдийг тоймлон хүргэж байна.

Хамгийн сүүлийн үеийн мэдээллээр “COVID-19”вирусын халдвар дэлхийн 109 оронд тархаад байна. Амралтын өдөр буюу гуравдугаар сарын 8-нд манай улсад Францын иргэн тусгаарлагдсан гэж хэлж байсан. Тус иргэний сорьц нь өчигдөр өглөө ХӨСҮТ-д ирсэн. Шөнийн 02:00 цагт шинжилгээний хариу гарч коронавирус илэрснээр манай улсад коронавирусын анхны тохиолдол илэрчээ. Энэ тухай Улсын онцгой комисс болон Эрүүл мэндийн сайд Д.Сарангэрэл, ЭМЯ, ДЭМБ, ХӨСҮТ-ийн холбогдох албаны хүмүүс шуурхай мэдээлэл өгч ажиллаж байна. Цаг үеийн мэдээллүүдийг тоймлон хүргэж байна.

ЭМЯ: ХӨСҮТ-ийн мэргэжлийн хоёр баг Дорноговь аймгийг зорилоо
“COVID-19” вирусын халдвар илэрсэн Францын иргэн гуравдугаар сарын 2-нд Москва-Улаанбаатар чиглэлийн “Аэрофлот” компанийн нислэгээр Улаанбаатарт ирээд Баянгол зочид буудалд гурав хоносон аж. Ингээд Улаанбаатар-Сайншанд чиглэлийн галт тэргээр Дорноговь аймгийн Улаанбадрах суманд очсон байна. Гуравдугаар сарын 7-нд бие нь зарайж байна гэсэн өгүүлэмжтэй кэмпийнхээ эмчид хандахад 37.4 хэмийн халуунтай байжээ. Тухайн эмч эрүүл мэндийн байгууллагад мэдээлсний дагуу шинжилгээ авахад коронавирус илэрсэн байна. Тухайн хүн Улаанбаатар хотод 40 хүн, Дорноговь аймагт 80 хүнтэй уулзжээ. Тэдгээр 120 хүний бүртгэлийг хууль хяналтын байгууллагаас гаргаж өгсөн. Мөн түүнтэй онгоцонд урагшаа гурав, хойшоо гурав, хажуу тийшээ гурван эгнээнд зорчсон хүмүүс, галт тэргээр хамт зорчсон 28 хүний нэрийг хууль хяналтын байгууллагаас гаргаж өгсний дагуу ХӨСҮТ-д тусгаарлаж шинжилгээ авч эхэлсэн” хэмээн салбарын сайд хэлэв. Түүнчлэн “Францын иргэнд нисэх онгоцны буудлын Хилийн мэргэжлийн хяналтын байгууллагаас 14 хоног өөрийгөө тусгаарлах зөвлөмж өгснийг мөрдөөгүй. Улаанбаатарт байх хугацаандаа “Веранда”, “Ариг” ресторанаар үйлчлүүлж, KFC-гээс хоол захиалж идсэн, галт тэрэгний буудал хүрэхдээ таксигаар үйлчлүүлсэн. Одоогоор түүнийг Дорноговь аймаг дахь кэмпд тусгаарласан байгаа. Эмнэлгийн тусламж үзүүлэхээр ХӨСҮТ-ийн мэргэжлийн хоёр баг Дорноговь аймгийг зорьсон. ХӨСҮТ-ийн рентген аппаратаар уушгинд нь ямар өөрчлөлт гарч байгааг газар дээр нь үзэх боломжтой учир өвчтөнийг оношилж, эмчлэх бүрэн боломжтой” гэв.

ДЭМБ: “COVID-19” халдварын тархалтыг дөрвөн үе шатанд хувааж байна
ЭМЯ-ны ээлжит мэдээллийн үеэр “COVID-19” халдварыг дэлхийн улс оронд тархаж буй байдлаар нь дөрвөн үе шатанд хувааж байна. Монгол Улс энэ зөвлөмжийн дагуу үйл ажиллагаа явуулж байна гэдгийг албаныхан хэлэв. Монгол дахь ДЭМБ-ын мэргэжилтэн О.Ариунтуяа “ДЭМБ-аас шинэ коронавируст халдварыг тархалтаар нь дөрвөн үе шатанд хуваан үзэж байна. Үүнд тохиолдол бүртгэгдээгүй, нэг буюу түүнээс дээш импортлогдсон, дэгдэлт голомтлон тархаж байгаа, өргөн цар хүрээний тархалттай гэж хуваан үе шат бүхэнд тохирсон зөвлөмжийг улс орнуудад өгч байгааг Монгол Улс мөрдөж байна. Иран, Итали улсад “COVID-19” халдвар сүүлийн 24 цагт 1000 гаруй тохиолдлоор нэмэгдсэн. Итали улсад 366 хүн нас барсан байна. Мөн хэд хэдэн хотод 16 сая хүнийг хамарсан хөл хорио тогтоолоо. БНСУ-д шинэ коронавируст халдвар авсан хүний тоо буурч, 360 тохиолдол шинээр бүртгэгдэж, 19 мянган хүн шинжилгээнийхээ хариуг хүлээж байна” гэв.
ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа “АНУ-д “COVID-19” халдвар авсан хүний тоо 550 боллоо. Нийт 34 мужид халдвар бүртгэгдсэнээс найман мужид онц байдал зарласан бөгөөд 21 хүн нас бараад байна. Харин Итали улсад сүүлийн нэг хоногт 133 хүн нас барж, нас баралтын тоо 366 боллоо. Тус улсад “COVID-19” халдвар авсан хүний тоо 25 хувиар өсч 7375 болоод байна. БНСУ-д 248 шинэ тохиолдол бүртгэгдсэний 190 нь Дэгү, 26 нь хойд Гёнсан, 10 гаруй нь Сөүл болон бусад хотод илэрсэн байна. Мөн Итали улсад олон нийтийг хамарсан бүх үйл ажиллагааг зогсоох шийдвэр гаргасан бол Катар, Саудын Арабын улсад “COVID-19” халдвартай холбоотой агаарын болон усан замын тээврээр зорчигч хүлээн авахгүй хэмээн мэдэгджээ” гэв.

ХӨСҮТ: Вирусын халдвартай дэлхийн 109 орон нүүр тулсан. Монголчууд сандрах хэрэггүй
Шинэ коронавирусын халдвар хүн амын дунд тархаж болзошгүй нөхцөл байдал үүссэн энэ үед ачааны хүндийг үүрэх эрүүл мэндийн салбарт Халдварт өвчин судлалын үндэсний төв голлох үүрэгтэй ажиллана. Тиймээс ХӨСҮТ-ийн захирал Д.Нямхүү иргэдийг аль болох сандарч тэвдэхгүй, тайван байхыг сануулсан юм. Тэрээр “Гуравдугаар сарын 7-ны ХӨСҮТ-д тусгаарласан нэг иргэнд шинэ коронавирусын халдвар илрээгүй. Дорноговь аймгийн Улаанбадрах суманд тусгаарласан нэг иргэнээс “COVID-19” вирус илэрсэн. Халдвар авсан хүнтэй нэгдүгээр хавьтал болсон иргэдийг илрүүлэх ажлыг зохион байгуулж, 123 иргэнийг тусгаарлаад байна. Хэдийгээр энэ удаа таагүй мэдээ дуулгаж байгаа ч иргэд айж, сандрах хэрэггүй. Шинэ коронавирусын халдвартай дэлхийн 109 орон нүүр тулсан. Монголчууд минь сандрах хэрэггүй. Төлөвлөлтийн дагуу ажиллах учраас бидний ажилд саад учруулахгүй байхыг хүсч байна” гэв.

ЭМЯ: Өвчтөний биеийн байдал тогтвортой байна

ЭМЯ-ны Эмнэлгийн тусламжийн газрын дарга Я.Буянжаргал: Нэгдүгээр сарын 9-нөөс хойш өнөөдрийг хүртэлх хугацаанд нийт 934 тохиолдлыг ажиглалтад авсан. Одоогоор 514 хүн ажиглалтад байна. Сэжигтэй 264 тохиолдлыг авч оношлуурын шинжилгээ хийж, оношийг үгүйсгэсэн ба нэг тохиолдлын онош батлагдсан. Энэ сарын 10-нд бид 06:00 цагийн үед ХӨСҮТ-өөс мэргэжлийн эмч нарын багийг Дорноговь аймгийн нэгдсэн эмнэлэг рүү зөвлөгөө өгч, тандалт судалгаа хийлгэхээр илгээсэн. Тус баг замдаа явж байгаа. Сая авсан мэдээллээр онош батлагдсан иргэний халуун 36.7 буюу хэвийн, бие нь зовиургүй байна гэсэн. Тухайн байрлаж буй кэмп дээр нь эмнэлгийн пункт, ханын хүчилтөрөгч болон бусад тоног төхөөрөмж бий. Өвчтөнд вирусын эсрэг эмчилгээ хийж байна” гэв.

Эх сурвалж: “Зууны мэдээ сонин

 

  • Шинэ
  • Их уншсан